Ышаныч
+21 °С
Болытлы
Барлык яңалыклар
рәсми бүлек
14 Май 2019, 12:29

Аскын авылында завод төзелеше башланды

Район хакимияте башлыгы Ришат Дихин авыл хуҗалыгы һәм икътисад мәсьәләләре буенча урынбасары Владислав Гыйльванов белән бәйрәм алдыннан рапс һәм ашлык культураларын эшкәртү заводы төзелешен карадылар. Җитештерү начальнигы Игорь Щекатуров, прораб Илдус Закарин белән әңгәмә барышында бу объектта эшләр ничек баруын белделәр.

— Әлегә нигез өчен котлован казылган, барысы да геодезист тарафыннан тикшерелде. Төзелеш материаллары ташыйбыз: ком, вакташ, арматура — бөтенесе дә сертификацияле. Кирәк-ярак саклау йортлары төзелгән, каравыл бар, — дип сөйләде Илдус Хәлит улы.

Хезмәткәрләр кирәкме дигән сорауга ул эшкә керергә теләүчеләр исемлеге зур, әмма эшчәнлек зуррак җәелдерелгәч алачакларын әйтте. Илдус Хәлит улы һәрберсе белән шәхсән аралаша.

Игорь Михайлович завод ничек эшләячәге турында сөйләде.

Руслан Саматов җитәкчелегендә “Олеокемикс” җаваплылыгы чикләнгән җәмгыяте елына 30 мең тонна орлык эшкәртү һәм 10 мең тоннадан артык үсемлек мае җитештерү куәте булган завод, шулай ук берьюлы 50 мең тонна ашлык сакларга сәләтле элеватор төзелешен башлады. Проектның хакы 1,6 миллиард сум тәшкил итә, аны 2020 елга төзеп бетерү һәм 149 эш урыны булдыру каралган, — диде ул. — Иң мөһиме июль ахырына кадәр жмых саклау өчен урын әзерләү. Ә көзен беренче корпус төзеләчәк, чөнки җиһазлар кыйммәтле, ул Чехиядән юлга чыкты инде, аны кар һәм яңгыр астында калдырырга ярамый.
Район үзәгендә төзелеш кайный башлавын күрү куанычлы, әлбәттә. Яңа эш урыннары булачагы да мөһим, димәк, яшьләр авылдан чыгып китмәячәк, югары уку йортын тәмамлаганнар эшкә туган ягына кайтачак.


“Урал” кооперативында

Арытаба Арбаш авылына, Илвер Солтангиров янына басуга юл тоттылар. “Урал” авыл хуҗалыгы кооперативында язгы чәчү эшләрендә җиде берәмлек техника эшли. Чәчү 50 процентка башкарылган. Уҗым ашлыклары 120 гектар били.

— Язгы басу эшләре — җаваплы чор, яхшы уңыш алу өчен бу чакта бөтен технологик һәм агротехник үзенчәлекләрне игътибарга алу таләп ителә. Басуда тәҗрибәле механизаторлар эшли һәм Башкорт авыл хуҗалыгы һөнәрчелек колледжы студенты Денис Саяпов практика үтә. Орлыклар җитәрлек, — дип сөйләде Илвер Закуан улы. — Әмма, үкенечкә каршы, дизель ягулыкка кытлык, аны бурычка алырга туры килә.

Шушы көннәрдә 150 баш мөгезле эре терлек көтүгә чыгачагы турында да әйтеп үтте. Шул вакытта Ришат Марат улы янына механизатор Хәлиуллин килде. Ул 38 ел хезмәт стажы белән пенсиясе бик аз булуы хакында сөйләде. Узган елны атказанган хезмәткәр исеме алуга Авыл хуҗалыгы министрлыгына документлар биргәннәр, әмма бернәрсә дә килеп чыкмаган. Район хакимияте башлыгы Владислав Шәрифулла улына бу мәсьәләне хәл итәргә кушты. Шулай ук төзелүче балык үрчетү хуҗалыгын карадылар. Шунда аларга Арбаш авыл биләмәсе башлыгы Фәнил Зыятдинов та кушылды.

Нина Николаева.
Читайте нас: