Башкортстанда Фәнни-белем бирү үзәге оештырыла

Башкортстан җитәкчелеге Фәннәр академиясе базасында углеводородлар табу һәм эшкәртүнең нәтиҗәлелеген арттыруга юнәлтелгән дөнья дәрәҗәсендәге берничә Фәнни-белем бирү үзәге оештырырга ниятли. Төбәк 2020 елда "Фән" гомумдәүләт проекты буенча Фәнни-белем бирү үзәге булдыру өчен дәгъва итә, дип хәбәр иттеләр республика Үсеш корпорациясе матбугат хезмәтендә.

Башкортстанда "Фән" гомумдәүләт проектын гамәлгә ашыру кысаларында нефть-газ тармагында санлы технологияләр һәм яңа материаллар эшләү буенча дөнья дәрәҗәсендәге Фәнни-белем бирү үзәген төзүгә керештеләр. Хөкүмәте карары белән Уфа, Русиянең башка 20 шәһәре белән беррәттән, перспективалы икътисади үсеш үзәге дип аталды, анда дөнья дәрәҗәсендәге фәнни-белем бирү үзәкләрен формалаштыру өчен шартлар тудырылган.

Башкортстан 2020 елда Фәнни-белем бирү үзәге булдыруга дәгъва итә. Ул Башкортстанның нефть, авиация, классик вузларын Русия Фәннәр академиясе филиалы белән берләштерәчәк. Үзәк гамәли тикшеренүләр үткәрәчәк, аларның нәтиҗәләре буенча продукт чыгару һәм инновацион предприятиеләр булдыру каралган.

"Фән" гомумдәүләт проекты максатлары буенча, 2024 елда Русия фәнни тикшеренүләр һәм эшләнмәләрне гамәлгә ашыручы әйдәүче илләр бишлегенә керергә тиеш.

2018 елның 7 маенда Президент Владимир Путин “Русия Федерациясенең 2024 елга кадәр үсешенең стратегик бурычлары һәм гомумдәүләт максатлары турында”гы указга кул куйган иде. Әлеге эшчәнлек шуңа ярашлы алып барыла.

#национальныепроекты;

#нацпроекты;

#региональныепроекты;

#регпроекты;

#нацпроектыБашкортостан;

#ВладимирПутин