Аграр стратегия заманча технологияләргә нигезләнә!

23-26 мартта башкалабыз Уфаның “ВДНХ-Экспо” күргәзмәләр комплексында “АгроКомплекс” XXXI Халыкара махсуслашкан күргәзмәсе һәм Агросәнәгать форумы узды. Дүрт көн дәвам иткән ил әһәмиятендәге әлеге аграр чараны ачу тантанасында Башкортстан Башлыгы Радий Хәбиров, Хөкүмәт Премьер-министры Андрей Назаров, Премьер-министр урынбасары, авыл хуҗалыгы министры Илшат Фазрахманов, Русиянең Авыл хуҗалыгы министрлыгы департаменты директоры Роман Некрасов, чит илдән килгән кунаклар, төрле министрлык һәм ведомстволар, предприятиеләр җитәкчеләре катнашты.

Башкортстанда утыз беренче тапкыр үткәрелүче күргәзмә тоташ ил күләмендә аграр галимнәр, белгечләр өчен чын мәгънәсендә һөнәри тәҗрибә уртаклашу, яңалыклар белән танышу мәйданчыгына әверелде. Өч дистә ел дәвамында үткәрелүче аграр форумның әһәмияте, билгеле, тармактагы казанышлар белән генә чикләнмәде, ә уртак проблемаларны хәл итүдә мәртәбәле “аграр трибуна”га әверелде. Агросәнәгать күргәзмәсе кысаларында оештырылган экспозицияләр һәм өч көн дәва­мында үткәрелгән “түгәрәк өстәл”ләр дә шуны күрсәтте. Быел Башкортстанда узган традицион чарада Русиянең 40 төбәгеннән 300дән артык компания катнашты. Чит илләр арасында Чехия, Венгрия һәм Белоруссия быел да активлыгын югалтмады. Әйткәндәй, быел халыкара форумда беренче тапкыр Байкал аръягы крае, Тверь һәм Омск өлкәләре үзләренең коллектив стендларын тәкъдим итте.
– Традициягә әйләнгән күргәзмә ачылу уңаеннан барыгызны да котлыйм, – диде Радий Хәбиров чараны ачу тантанасындагы чыгышында. – Башкортстанда үтүче форумда беренче тапкыр катнашучы төбәкләрне күрү аеруча шатландыра. Мин әлеге чарада катнашучылар геогра­фиясенең елдан-ел киңәячәгенә ыша­нам... Башкортстан­ның агросәнәгать комплексы актив үсеш юлында. Без авыл хуҗалыгын модернизацияләү белән генә чик­ләнмибез. Авылларыбыз да матур үзгәрешләр кичерә. Авыл террито­рияләрен комплекслы үстерү программасы өчен Русиянең Авыл хуҗалыгы министрлыгына зур рәхмәт. Без ул программада актив катнашабыз...
Радий Хәбиров, дөнья күләмендә таралган коронавирус пандемиясе тудырган катлаулылыкларга карамастан, 2020 ел йомгаклары буенча республика авыл хуҗалыгы тармагының җитештерү кү­ләмендә дә, ин­вестицияләр җәлеп итү буенча да үсеш күрсәтүен билгеләде.
Республика Башлыгы сүзләренә караганда, узган ел аграр җитеш­терү­че­ләргә төрле субсидияләр һәм лизинг механизмнары аша техника сатып алуда зур ярдәм күрсәтелгән. “Мондый ярдәм бик вакытлы булды. Быел безнең аграрийлар техниканы шундый теләк белән сатып ала башлады ки, хәтта дефицит барлыкка килде”, – диде Радий Хәбиров.
Республикабызга соңгы елларда кай­тарылган яңа техника һәм җиһаз­лар, эшкәртү һәм азык сәнәгатендәге уңышлар барысы да халыкара күргәзмә биеклеген сакларга гына түгел, ә аны яңа технология һәм тәҗрибәләр мәктәбе итеп күрсәтергә дә этәргеч бирде. Бу фикерне чарада катнашучы Русия Авыл хуҗалыгы министрлыгының Үсемлекчелек, механикалаштыру, химияләштерү һәм үсем­лекләрне саклау департаменты директоры Роман Некрасов та куәтләде. Мәскәү кунагы халыкара форумда катнашучыларга федераль аграр ведомство башлыгы Дмитрий Патрушевның сәлам­ләү сүзен җиткерде.
– Әлеге күргәзмә Ру­сиядә һәм Идел буе федераль округында иң “өл­кән”нәрдән исәпләнә. Без аның максималь дәрәҗәдә нәтиҗәле һәм файдалы үтүен телибез. Биредә киләчәк хезмәттәшлеккә этәргеч бирүче эшлекле бәйлә­нешләргә нигез салыначагына ышанабыз... Мондый күргәзмә кешеләргә иртәгәсе көнгә ышанычны арттыру өчен да кирәк. Чәчү кампаниясе якынлашканда аграр форум өстәмә көч тә бирә, – диде Роман Некрасов.
Республика Башлыгы күргәзмәгә куел­ган экспозицияләр, техника, авыл хуҗалыгы продукцияләре үрнәкләре белән танышты. 159 берәмлек техника урнаштырылган төрле мәйданчык­ларда Радий Хәбиров аграр техника җитеш­терүче предприятиеләр вә­килләре белән очрашты. Радий Фәрит улы республика аграрийларын техника белән тәэмин итүдә “Росагролизинг” акционерлар җәмгыяте белән нәти­җәле эшләү зур роль уйнавын ассызыклады һәм лизинг механизмнарын киләчәктә дә киңәйтергә ки­рәклеген билгеләде.
Халыкара махсуслашкан күргәзмә кысаларында республика Башлыгы Радий Хәбиров онлайн-режимда “Акрос РБ” компаниясенең авыл хуҗалыгы техникасы өчен агрегатлар һәм запас частьләр җитештерү цехын ачуда катнашты. 1,5 мең квадрат метр мәйданны биләгән яңа цех Уфа районында урнашкан. Әлеге проект узган елның апрелендә “Инвестиция сә­гате”ндә хупланган иде. Проектның инвестиция күләме 220 миллион сум тәшкил итә. Аны тормышка ашыру предприятиедә 30 эш урыны булдырырга мөмкинлек биргән. “Акрос РБ” җәмгыяте республиканың аграр техника ремонты хезмәтендә лаеклы урын алачагына өмет зур.
Аграр форумда Хөкүмәт Премьер-министры Андрей Назаров рес­публиканың авыл хуҗалыгы тармагы алдында торган мөһим бурычлар турында сөйләде.
– Аграр тармак тотрыклы үсештә, – диде Премьер-министр. – Без соңгы елларда экспорт мөмкинлекләрен арттырдык. Узган ел, мәсәлән, авыл хуҗалыгы экспорты 60 процентка үсте, ягъни, аны 65,1 миллион долларга арттырып, 177 миллион долларга җиткердек. Пандемия шартларында эчке базарда туклану продуктлары дефициты булмады, күре­нүенчә, азык-төлек хәвефсезлеген тәэмин итүдә нәтиҗәле эшләдек.
Икътисадның мөһим тармакларының берсе булган аграр комплекс алдында торган бурычларга тукталып, Андрей Назаров киләчәктәге үсеш инновацион санлы икътисад карарларына һәм кече бизнесны заманча үстерүгә бәйле булырга тиеш, һәм без экологик яктан чиста продукция җитештерүгә һәм экспортны үстерүгә йөз тотарга тиеш, дип белдерде.
Халыкара күргәзмә кысаларында, дүрт көн дәвам иткән чаралар эшлекле очрашуларга бай булды. Конкурслар оештырылды. Фәнни-гамәли конфе­рен­цияләрдә галимнәр, белгечләр фикер алышты.

Олег Төхвәтуллин.